Select the Title to read

ស្នេហាផ្អែមល្ហែម!

(ស្នេហា ពេជ្រ និង អមរា) 

លុះថ្វាយចង្ហាន់

ប្រគេនលោកឆាន់

បានចប់សព្វគ្រប់

ស្រ្តីទាំងពីរ

នៅលេងលើកុដិ

សារសងរៀបរាប់

ជាប់មាត់ហូរហែ។

-ឆ្លៀតឱកាសនោះ

អមរាក៏ចុះ

ពីកុដិទៅដែរ

រកមើលឆ្វេងស្ដាំ

ក្រែងឃើញប្រុសស្នេហ៍

នាងដើរទៅក្បែរ

មាត់ស្រះក្រោយវត្ត។

-ស្រាប់តែឃើញពេជ្រ

ដើរពីខាងលិច

ដោយក្ដីស្ងៀមស្ងាត់

កាន់កូនពោធិមួយ

កំពស់ពីរធ្នាប់

យកមកជីកកប់

ដាំនៅមាត់ស្រះ។

-ឃើញភ្លាមអមរា

សួរពេជ្រភ្លាមថា៖

«ពោធិធំយូរណាស់!

ម្ដេចបងមិនដាំ

ស្វាយដូងចេកម្នាស់

បានផ្លែរហ័ស

ខុសពីពោធិជ្រៃ? »។

វណ្ណៈស្នេហ៍

(ស្នេហា និងវណ្ណៈគ្រួសារ) 

-ជូនបងមនោពេជ្រសម្លាញ់ចិត្ត

សូមប្រុសវរមិត្រចងចាំថា

អូនត្រូវចូលម្លប់ហើយជីវ៉ា

ហើយត្រូវៀបការឆាប់ៗទៀត។

-បើបងពិតជាស្រលាញ់អូន

សូមប្រុសនឹមនួនខំឆ្លះឆ្លៀត

ប្រឹងប្រែងពុះពារគ្រប់ល្បិចស្នៀត

កុំឲ្យអូនឃ្លាតពីបងបាន។

-ល្ងាចនេះអូនមករកបងហើយ

សូមប្រុសត្រាណត្រើយចាំក្នុងប្រាណ

ព្រោះអូនចង់ដឹងពាក្យដើមដាន

មុនលាកល្យាណទៅចូលម្លប់។

ដើម្បីប្រទេសជាតិ ស៊ូឃ្លាតស្នេហ៍ស្មោះ

(ប្រទេសមានសង្រ្គាម តែពេជ្រជាប់សាងព្រផ្នួស) 

-ខ្ញុំព្រះករុណាសូមទូលថ្វាយ

នាមជាចុតហ្មាយរាយសេចក្ដី

សូមលោកបងជ្រាបតាមអត្ថន័យ

ព្រោះជាតិមានភ័យមិនបានសុខ។

-ទ័ពសៀមនឹងត្រៀមលើកកម្លាំង

ចូលមកតតាំងច្បាំងលុយលុក

នេះបើតាមពាក្យលោកឪពុក

ថាពេលខាងមុខសង្រ្គាមធំ។

-បើស្រុកមានទុក្ខភ័យដូច្នេះ

ពុំគួរគេចវេះពួនសម្ងំ

ត្រូវរួមកម្លាំងគ្នាឲ្យមាំ

សាមគ្គីពូនផ្ដុំជាទ័ពឡើង។

-ប្រទេសបានរស់ឈ្មោះថ្លាថ្លៃ

ព្រះពុទ្ធសាសនាក៏បានថ្កុំថ្កើង

ប្រញាប់ចូលជួយស្ទួយជាតិយើង

ឲ្យបានរស់ឡើងវិញពេលនេះ។

ស្នេហាស្មោះស្ម័គ្រ ដូចទុំ និងទាវ

(អមរា សរសេរសំបុត្រឲ្យពេជ្រ មុនចូលរោងការ) 

-អក្ខរាលាបង

អូនបានគួចចង

ផ្ញើលើមែកពោធិ

លាបងរៀបការ

ទាំងទឹកភ្នេកហូរ

តែអូនមិនប្ដូរ

ចិត្តពីបងឡើយ។

-រៀបការទាំងធ្មេច

គ្រាន់ជាឧបកិច្ច

ក្រាបផ្ទឹមលើខ្នើយ

តែអូនស៊ូក្ស័យ

ទៅតាមបងហើយ

សូមប្រុសត្រាណត្រើយ

មកយកអូនផង។

-តើរស់ធ្វើអ្វី

បើគ្មានប្រុសថ្លៃ

ដៃថ្នមត្រកង

រស់ដូចរៃមាស

និរាសបង្គង

សូមបួងសួងផ្សង

ជួបបងជាតិក្រោយ។

-តែបើបងរស់

បងកុំស្រណោះ

ស្ដាយរូបអូនឡើយ

នេះគឺបុព្វេ

សាងទុកមកហើយ

ឲ្យយើងព្រាត់ត្រើយ

ព្រាត់ខ្នើយវាសនា។

-អក្ខរាចងស្បៃ

ទុកជូនប្រុសថ្លៃ

ថ្ងៃអូនរៀបការ

រលកទន្លេ

ជេរស្ដីវាសនា

គួចយកជីវ៉ា

អមរាបាត់សូន្យ។

-អាំលាវរមិត្រ

សូមបងកុំភ្លេច

ឆ្លងពោធិជួសអូន

ធ្វើបុណ្យសាងស្ពាន

ធ្វើទានលាងក្បូន

ឲ្យបងជួបអូន

លើក្បូនជាតិថ្មី។

សុខចិត្តស្លាប់

ដោយឪពុកបង្ខុំឲ្យរៀបការជាមួយគ្រោត 

ពាក្យ ៣

សូមពុកម៉ែ

កុំប្រកែ

ប្រកាន់កូន

យប់ស្ងាត់សូន្យ

កូនសូមលា

ពុកម៉ែហើយ

កូនបានលើក

កិត្តិយសពុក

មកដល់ត្រើយ

តែពុកអើយ

កូនមិនអាច

រស់បានទេ។

-បើនៅរស់

ឈ្មោះជាស្រី

ក្បត់សច្ចៈ

ស៊ូមរណៈ

តាមខ្សែទឹក

ក្នុងទន្លេ

រស់ខ្មាសពោធិ

ធ្លាប់បូជា

ថាមិនប្រែ

ជាស្ត្រីខ្មែរ

ស្មោះស្ម័គ្រតែ

មួយនិងមួយ។

-សូមខ្សែទឹក

ដឹកនាំយក

វិញ្ញាណខ្ញុំ

ទៅជួបជុំ

នឹងបងពេជ្រ

ព្រលឹងត្រួយ

ដែលជាតិនេះ

ខ្ញុំស្មោះស្នេហ៍

តែបងមួយ

សូមព្រះជួយ

ឲ្យបំណង

ខ្ញុំសម្រេច។