ក្រកិច្ច ក្រកល ក្រដឹង ក្រយល់ ក្រវៃច្នៃទាស់
March 23, 2008 – 9:09 pm
ខ្ញុំបាទ សូមជំរាបសួរមិត្រទាំងអស់! ខ្ញុំបានចូលទៅវេបសាយ មណ្ឌលខ្មែរនៅស្វីស ជាញឹកញាប់ ក្នុងនោះមានអ្វីគ្រប់បែប ដែលវេបសាយមួយដ៏គួរឲ្យ ស្ងប់ស្ងែង ។ តែទាស់តែម្យ៉ាងគឺ ចំពោះអក្ខរាវិរុទ្ធ ខ្ញុំសង្កេតឃើញថា មិនមែនសរសេរខុសដោយអចេតនាទេ គឺមានចេតនានឹងសរសេរ គឺគ្រប់ពាក្យខ្មែរ ដែលមានស្រៈពេញតួ គឺៈ 
ស្រៈពេញតួទាំងនេះ ត្រូវបានសរសេរមកជាព្យាង្គរាយទាំងអស់ គឺបែរមកជាសរសេរៈ
| សរសេរទៅជា | សរសេរទៅជា |
| ឥ > អិ | ឦ > អ៊ី |
| ឧ > អ៊ុ | ឩ > អ៊ូ |
| ឯ > អេ | ឰ > អៃ |
| ឱ > អោ | ឪ > អូវ |
| ដូចជាពាក្យ | សរសេរទៅជា |
| ឥន្ទព្រហ្ម | អិនព្រហ្ម |
| ឧត្តម | អុត្តម |
| ឦសាន្ត | អ៊ីសាន្ត |
| ឯណា ? | អែណា ? |
| ឰដ៏អាកាស | អៃដ៏កាស |
| ឱអនិច្ចា | អោអនិច្ចា |
| ឪពុក | អូវពុក |
ខ្ញុំក៏មិនដឹងហេតុអីដែរ ដែលគេសរសេរបែបនេះ ហើយខ្ញុំមិនយល់ស្របដែរ យើងជាអ្នកតវង្សត្រកូលអំពីបុព្វបុរសខ្មែរយើង ដែលលោកខំបង្កើតឡើង តាំងពីបូរាណកាលមក សំរាប់ឲ្យយើងថែរក្សា តែយើងបែរបំបាត់ចោលទៅវិញ។ ឬក៏គេគិតថា អក្សរនេះមិនជារបស់ខ្មែរ? ហើយអក្សរទាំងនេះភាគច្រើនច្រើនតែពាក្យបាលី ហើយនិងសំស្រ្កឹត ឬថាស្រៈនេះជាអក្សរបាលី? តែបាលីគ្មានតួអក្សរទេ នៅសល់តែភាសានិយាយទេ ហើយអក្សរសំស្រ្កឹតក៏គ្មានលក្ខណៈបែបនេះដែរ!
អក្សរខ្មែរកំពុងតែស្រុតចុះ ដូចជា សៀវភៅខ្មែរឥឡូវ មួយៗដូចជាគ្មានការត្រួតពិនិត្យឲ្យបានត្រឹមត្រូវទេ ដែលជាហេតុធ្វើឲ្យក្មេងៗ មានការពិបាកក្នុងការរៀន មានការយល់ច្រឡំ ដូចជាខ្ញុំកាលនៅពីតូច ធ្លាប់ឃើញគេសរសេរ សុបិន មានជើង ត (សុបិន្ត) ដល់ឃើញគេសរសេរគ្មានជើងត ខ្ញុំថាគេសរសេរខុស មកពីសរសេរមានច្រើនបែបពេក។ នេះហើយដែលយើងគួរពិនិត្យពិចារណា ចំពោះរឿងការចុះផ្សាយ តាមបណ្ដាការចុះផ្សាយអ្វីផ្សេងៗ ដូចជា ការសរសេរ តាមទូរទស្សន៍ តាមសៀវភៅ តាមវេបសាយ ជាពិសេសតាមចំរៀងខារ៉ាអូខេ ភាគច្រើនក្មេងៗ ចូលចិត្ត ច្រៀងខារ៉ាអូខេ ហើយភាគច្រើន នៅតាមក្រុមហ៊ុនមិនសូវមានការពិនិត្យឲ្យបានច្បាស់លាស់ទេ មុននឹងចេញលក់នៅតាមទីផ្សារ មានការសរសេរខុសច្រើនមែនទែន ដែលជាហេតុធ្វើឲ្យមានការជែកទាស់ទែងគ្នា។ សូម្បីព្រះពុទ្ធមានតែមួយសោះ តែអ្នកកាន់ព្រះសាសនាមានច្រើនបែប មានធម្មយុត្តិ មានមហានិកាយ មានមហាយាន មានហីនយាន ព្រោះតែរឿងអី? របស់មានតែមួយ តែយើងធ្វើឲ្យចេញជាពីរ ដែលជាហេតុធ្វើឲ្យមានការពិបាកក្នុងការសម្រេចចិត្តសំរាប់អ្នកប្រើ ដូចជាទូរស័ព្ទ Nokia ជាដើម មានរបស់ចិន មានរបស់ពិត សំរាប់អ្នកចេះមើល មិនថ្វីទេ តែបើគ្នាមិនដែលដឹងនោះពិតជារឿងធំមិនខាន។ នេះតាមការគិតរបស់ខ្ញុំ សូមលោកអ្នកអានជួយគិតវិភាគពិចារណាផងចុះ ហើយខ្ញុំសូមទោសចំពោះអ្នកគ្រប់គ្រង មណ្ឌលខ្មែរនៅស្វីសផង ប្រសិនជាខ្ញុំថាទៅមានការខុសឆ្គងក៏សូមទានមេត្តាអភ័យទោសផងទៅចុះ ខ្ញុំថានេះគឺថាទៅតាមការមើលឃើញតែប៉ប៉ុណ្ណោះ!
