ញើសឈាមពុកម៉ែ

-ញើសឈាមពុកម៉ែ ហូរស្រក់ផែនដី

ទាំងយប់ទាំងថ្ងៃ ដួងចៃម៉ែស៊ូ

ទោះរងារក្តៅ មិនដែលទួញថ្ងូរ

ធ្ងន់ស្រាលលោកស៊ូដើម្បីនរណា  ។

-ឈ្ងោកមុខរកស៊ី នៅក្រោមថ្ងៃក្តៅ

ភ្លៀងផ្គរម៉ែនៅ បំពេញកិច្ចការ

អត់ធន់អត់ឃ្លាន មិនហ៊ានពិសារ

ទុកម្ហូបអាហារឆ្ងាញ់ឱ្យកូនអ្នក   ។

-ពុកម៉ែកូនខ្លះ ពន់រែកត្រាច់ចរ

ស្រែកឡើងស្អកកចរទៅគ្រប់ផ្ទះ 

ស្មាលោកពងបែក ជើងលោកស្រាំប្រេះ

ឈឺខ្នងចង្កេះក៏មិនចុះចាញ់        ។

-ពុកម៉ែកូនខ្លះ ធ្វើស្រែចំការ

ភ្លៀងផ្គរម៉្តេចម្តា មិនដែលទោរម្នេញ

ចាប់កាំបិតចប រួចហើយឆ្ពោះចេញ

មិនដែលចុះចាញ់ទោះភ្លៀងទោះផ្គរ។

-រាង្គកាយទ្រុឌទ្រោម ស្គាំងស្គមល្ហិតល្ហៃ

តែដួងហប្ញទ័យ ពុកម៉ែស៊ូ

ធ្វើការធ្ងន់ស្រាល មិនដែលត្អូញថ្ងូរ

ញើសឈាមស្រក់ហូរដើម្បីកូន។