Select the Title to read

ត្រកូលខាងដើមខ្ញុំអក្សរ  “ ង  ”

ថែម(ធ្មេញកណ្ដុរ) “ ៉ ” ប្រកបលើ

ស្រះ (អា) “ា” “ន” (បន្តក់) “់” ជាដំណើរ

ជាឈ្មោះប្រសើរជីតាខ្ញុំ។

“សុជាតិ” សុ ល្អពីកំណើត

ជាតិ គឺការកើតដ៏ឧត្ដម

ជាឈ្មោះខ្ញុំពិតឥតបន្លំ

សូមមេត្តកុំហៅទៅខុស។

សម្លរមានរសព្រោះមាន ជាតិ

ស្រលាញ់ជាតិ ស្នេហ៍ជាតិ មានទាំងអស់

ទីណាមានជាតិគឺឥតមោះ

និយាយដោយស្មោះឥតមុសា។

នេះគឺអត្ថន័យ នៃនាមឈ្មោះ

ប្រែមកត្រួសៗតាមតម្រា

មិនមែនថាខ្ញុំចេះតែថា

សូមយាយសូមតាត្រាប្រណី។

ខ្ញុំកើតនៅខែមិគសិរ

ប៉ែតសិបបួនរេទីដប់បី

ភូមិស្វាយសំរោងសែនអាល័យ

តាកែវ នៅ ព្រៃ កប្បាសជាក់។

ឪពុកខ្ញុំបាទ នាមឈ្មោះ ងន

ដែលខ្មោចជីដូនលោកបានដាក់

ឈឹម ឈួន មាតា ប្រាប់ឥតលាក់

បងប្អូន ៨ នាក់ខ្ញុំកូនពៅ។

ពេលនេះម៉ែឪគាត់ចាស់ៗ

អាសូរខ្លួនណាស់ព្រោះតែនៅ

កំលោះខ្លួនមួយព្រួយពេកកូវ

បងការអស់ទៅនៅតែឯង។

ណាមួយគ្រួសារក៏ក្រខ្សត់

ខ្ញុំត្រូវខាំមាត់សែនចំបែង

ព្រោះម៉ែឪចាស់ឈប់ពោលថ្លែង

គឺគាត់លះលែងហើយស្រែចំការ។

អត្តា ហិ អត្តនោ នាថោ

ខ្ញុំត្រូវដេកថ្ងូរអនាថា

ខ្លួនទីពឹងខ្លួនឥតអ្នកណា

ជួយយកអាសារហើយពេលនេះ។

ហើយម៉ែផ្ដាំថានែ៎ កូនពៅ

ពេលនេះកូនត្រូវតែជំនះ

ធ្វើស្រែចំការកុំប្រហែស

ក្រែងលផលនេះនឹងជួយកូន។

ធ្វើម៉េចត្រកូលយើងក្រីក្រ

សូមកូនប្រុសល្អកុំសោះសូន្យ

ត្រូវខំប្រឹងរៀនឱ្យរលូន

ពេលនោះហើយកូនពេលថ្ងៃរះ។